आजको शिक्षा संवाददाता
शिक्षाका लागि राष्ट्रिय अभियान एनसिई नेपालले प्रमुख राजनीतिक दलहरुलाई नेपालको सार्वजनिक शिक्षा सुधार्ने विषयलाई आउँदो चुनावी मुद्दा बनाउन सुझाब दिएको छ ।
आगामी मंसिर ४ गते हुन गइरहेको संघीय संसद र प्रदेशसभाको निर्वाचनका लागि घोषणापत्र बनाउन दलहरु व्यस्त बनिरहेकै बेला एनसिई नेपालले नेपाली कांग्रेस, नेकपा एमाले र नेकपा माओवादी केन्द्रलाई आइतबार १६ बुँदे सुझाब–पत्र बुझाएको हो । एनसिई नेपालका अध्यक्ष राजेन्द्र पहाडीको नेतृत्वमा एमालेका उपमहासचिव तथा पूर्व परराष्ट्रमन्त्री प्रदीप ज्ञवाली, नेपाली कांग्रेसका सहमहामन्त्री एवं घोषणापत्र तयारी समितिका प्रवक्ता जीवन परियार र माओवादी केन्द्रका सचिवालय प्रमुख श्रीराम ढकाललाई सुझाब–पत्र बुझाइएको थियो । दलहरुले आधारभूत तहसम्म अनिवार्य तथा माध्यमिकसम्म निःशुल्क शिक्षा दिने संवैधानिक व्यवस्थालाई नभुली त्यसलाई वास्तविक कार्यान्वयन गराउने उपाय र प्रतिबद्धता घोषणापत्रमा उल्लेख गर्नुपर्ने सुझाब–पत्रमा सुझाइएको छ । साथै, अनिवार्य तथा निःशुल्क शिक्षासम्बन्धी ऐन कार्यान्वयन नभुल्न पनि एनसिईका पदाधिकारीले सचेत गराएका छन् ।
संघ, प्रदेश तथा स्थानीय तहले शिक्षामा २० प्रतिशत बजेट छुट्याउनुपर्ने र कोभिड–१९ महामारीलगायत अन्य विपत्ले पारेको शैक्षिक क्षतिलाई कम गर्न थप लगानी गर्ने प्रतिबद्धता दलहरुले आफ्नो घोषणापत्रमा जनाउनुपर्नेमा एनसिई नेपालले जोड दिएको छ ।
सुझाब–पत्र बुझ्दै एमाले उपमहासचिव ज्ञवालीले १६ वटै सुझाबलाई आफ्नो पार्टीले घोषणापत्रमा समेट्ने प्रतिबद्धता व्यक्त गर्नुभयो । उहाँले संविधानमा व्यवस्था भएअनुसार शिक्षा पाउने बालबालिकाको हक दिलाउन एमाले सचेत रहिरहने बताउनुभयो ।
कांग्रेस सहमहामन्त्री परियारले दलित र पिछडिएका समुदायका बालबालिका विद्यालयको पहुँच बाहिर रहेका र पढ्नका लागि भर्ना भएकाहरुको ‘ड्रपआउट’ दर पनि उच्च रहेकाले तिनलाई सम्बोधन हुनेगरी आफ्नो दलले घोषणापत्रमा स्पष्ट प्रतिबद्धता उल्लेख गर्नेछ भन्नुभयो ।
माओवादी केन्द्रका सचिवालय प्रमुख श्रीराम ढकालले शिक्षासम्बन्धी एनसिईले दिएको सुझाब आफ्नो पार्टीले शुरुदेखि उठाउँदै आएको मुद्दासित मिल्दोजुल्दो भएको र यसलाई घोषणापत्रमा समेटिने स्पष्ट पार्नुभयो । उहाँले एनसिई नेपालले उचित समयमा सुझाब दिएको पनि बताउनुभयो ।
सुझाब–पत्र बुझाउने क्रममा एनसिई नेपालको टोलीमा उपाध्यक्षद्वय शुभेन्द्रमान श्रेष्ठ तथा सान्त्वना देवकोटा केसी, महासचिव सुदर्शन सिग्देल, सचिव टेकराज अवस्थी, कार्यक्रम प्रबन्धक राम गैरे र कार्यक्रम संयोजक लक्ष्मी नेपाल सहभागी हुनुहुन्थ्यो ।
