सुदर्शन सिग्देल/काठमाडौं
नेपाल शिक्षक महासंघले विद्यालय शिक्षा विधेयकका लागि सरकारले दुईवटा विकल्पमा जान सक्ने शर्त राख्दै त्यसो गर्न पनि नचाहेमा आन्दोलन अवधि लम्बिने बताएको छ ।
राजधानीकेन्द्रित शिक्षक आन्दोलनको नेतृत्व गरिरहेको महासंघका अध्यक्ष लक्ष्मीकिशोर सुवेदीले दुई विकल्प अघि सार्दै आजको शिक्षासित भनेका छन्, ‘पहिलो शर्त त सरकारले तत्काल संसदको वर्खे अधिवेशन बोलाएर तुरुन्तै विधेयक प्रस्तुत गर्नु पर्छ । दोस्रोचाहिँ यदि अधिवेशन नबोलाउने हो भने अध्यादेश ल्याएर भएपनि ऐन जारी गर्नु पर्छ ।’
अध्यक्ष सुवेदीले प्रधानमन्त्री र उनको दल, सत्तासिन नेपाली कांग्रेसका शीर्ष नेताहरुले चाहेमा संसदको वर्खे अधिवेशन तत्काल बोलाउन असम्भव नहुने बताए । उनले शिक्षकहरुले उदारो सम्झौतामा आन्दोलन नरोक्ने सुनाए ।
शिक्षकहरुले यही चैत २० गतेदेखि राजधानीकेन्द्रित जुलुस तथा सभा गर्दै आएका छन् । शिक्षा ऐन जारी नभई घर नफर्कने भन्दै दिनहुँ हजारौं संख्यामा शिक्षकहरुले प्रदर्शन गर्दै आएका छन् ।
