सुदर्शन सिग्देल/काठमाडौं
आन्दोलनरत नेपाल शिक्षक महासंघले यही २५ चैतबाट लागू हुनेगरी शैक्षिक हड्ताल घोषणा गरेको छ ।
यही २० चैतदेखि राजधानीकेन्द्रित सडक आन्दोलनमा होमिएको महासंघले ‘आन्दोलनलाई अझ सशक्त गराउन’ शैक्षिक हड्ताल ‘उदघोष’ गर्नुपरेको जनाएको छ । आइतबार प्रेस विज्ञप्ति जारी गर्दै महासंघले ‘देशभरका सबै विद्यालय बन्द गरी सबै शिक्षक–कर्मचारीलाई काठमाडौंमा अनिवार्य आउन’ उर्दी जारी गरेको छ । महासंघसँग आबद्ध १५ वटा घटक संगठनहरुको संयुक्त हस्ताक्षरमा शैक्षिक हड्ताल घोषणा गरिएको हो ।
महासंघले आन्दोलनको अवधिमा उत्तरपुस्तिका परीक्षण, नतिजा प्रकाशन एवं नेपाल सरकार, प्रदेश सरकार तथा ती अन्तर्गतका र स्थानीय तहलगायतबाट राखिएका तालिम, गोष्ठी, सेमिनार तथा सार्वजनिक कार्यक्रमहरुमा संलग्न नहुन शिक्षक–कर्मचारीलाई आग्रह गरेको छ ।
एसइइ तथा विद्यालयका अरु तहहरुको वार्षिक परीक्षा सम्पन्न भई नतिजा आउन बाँकी रहेको अवस्था छ । नयाँ शैक्षिक शत्र शुरु हुन एक साता मात्र बाँकी रहेका बेला गरिएको शैक्षिक हड्तालले बीचमा कुनै सम्झौता हुन सकेन भने नतिजा प्रकाशन र भर्ना अभियान प्रभावित हुने निश्चित छ ।
शिक्षक महासंघको शैक्षिक हड्तालले विद्यालय शान्तिक्षेत्रप्रतिको प्रतिबद्धताको भने शिक्षकहरुबाटै उल्लंघन हुने देखिन्छ ।
